En Prouvènço de bas se fai la bastejado dis oustau. Es ansin qu’ai fa aqueù pouèmo per baia un noum à moun oustau ! Ero la festo aqueù jour e soun vengu li tambourinaire : avèn canta la Prouvènço et begu un cop emé touti lis amis !

Ero vengudo un beù matin

Per nisa dins lou grand pin

A ieù m’agradè bravamen

De veire soun anamen

 

Uno venguè, piei mai de vint

Voulastreja dins lou jardin !

Venien, à voù, à moulounado

Beca moun gran, jamai lassado.

 

Es revengudo lou lendeman

E se pausè dedins ma man

Ere ben fiero en aquèu jour

Cresiéu qu’anave faire lou tour

 

Lou tour doú pin émai doù ceù

En coumpagno de moun anceù

Disieú : « Mounte siès, bouscarleto ? »

Subran venié, fasent l’aleto...

 

Pamens un triste jour d’estiéu

De bado ai crida moun aucèu...

Enfin l’agasso trufarello

Souleto a respoundu, crudello :

 

« Lou sas ? A parti la bouscarlo

Vieùre sa vido à grand cop d’alo ! »

Me prengué coume un tremoulun,

Lou cor quicha de l’amarun.

 

O Bouscarleto !

 

Vieùra toujour toun souveni,

Se quauque jour, qu’aucun me dis :

« De quei lou noum de toun oustau ? »

Iè respoundrai emè proun gau !

 

Es la « Bouscarlo ! » E beleù

Vesent acò, moun bel aucèu,

A tiro d’alo tournara,

Per escouta lou mestierau

 

Mai déja vuei ma bouscarleto

Te gramacian, gento amigueto !

Ieù, lou Ramoun émai lou chin !

Esvartant de nous lou pegin

N’as fa ama l’immenso Crau

Ounte mestrejo lou mistrau

Lire la traduction